TERMDAT, la banca da datas da terminologia da l'administraziun federala svizra
TERMDAT è la banca da datas da terminologia da l'administraziun federala svizra. Ella vegn manada da la secziun da terminologia da la chanzlia federala.En TERMDAT chattais Vus la terminologia giuridica ed administrativa svizra en las quatter linguas naziunalas - tudestg, franzos, talian e rumantsch - ed en englais. Las singulas fischas vegnan elavuradas en il rom da glossaris tematics ed en collavuraziun cun expertas e cun experts da l'administraziun federala u dal sectur privat.
TERMDAT en l'internet
La banca da datas ch'è accessibla en l'internet cuntegna exclusivamain la part validada da TERMDAT e sa drizza ad utilisadras ed ad utilisaders che n'han betg access a l'entira banca da datas en l'intranet da l'administraziun federala.Ils terms, las scursanidas, ils titels dals relaschs federals, las designaziuns d'autoritads, d'instituziuns e d'organisaziuns svizras ed internaziunalas sco er las ulteriuras infurmaziuns terminologicas en TERMDAT derivan per gronda part da la legislaziun svizra ed appartegnan a las domenas las pli differentas (furmaziun, energia, finanzas, commerzi, industria, cultura, agricultura, ambient, traffic, economia e.u.v.).
TERMDAT en l'internet, sviluppà da Multicorpora, è optimà per il Internet Explorer 7.0. L'effectiv da datas vegn actualisà regularmain. La pagina da consultaziun stat a disposiziun mo per tudestg, per franzos e per englais. La versiun taliana vegn agiuntada proximamain.
TERMDAT en l'intranet
La banca da datas cumpletta ch'è accessibla en l'intranet da l'administraziun federala cumpiglia actualmain var 400'000 fischas ch'èn ubain validadas ubain en elavuraziun. Ellas derivan da l'administraziun federala sco er dals chantuns Berna, Friburg, Vallais e Grischun.Las collavuraturas ed ils collavuraturs dals servetschs publics (administraziuns chantunalas, scolas autas, instituts da perscrutaziun e.u.v.) sco er las persunas privatas che lavuran per l'administraziun federala pon dumandar in certificat dad SSL a TERMDAT e survegnan alura access a l'entir effectiv da datas da TERMDAT. Las indicaziuns ch'i dovra per dumandar in certificat èn: il num, il prenum, l'adressa uffiziala dad e-mail e - per persunas privatas - ina persuna da contact tar l'administraziun federala.
La secziun da terminologia As giavischa ina buna consultaziun.